{"id":7582,"date":"2012-11-11T22:42:39","date_gmt":"2012-11-11T20:42:39","guid":{"rendered":"https:\/\/agustinfernandezpaz.gal\/as-uvas-da-ira-2\/"},"modified":"2012-12-06T18:17:27","modified_gmt":"2012-12-06T16:17:27","slug":"as-uvas-da-ira","status":"publish","type":"post","link":"https:\/\/agustinfernandezpaz.gal\/es\/as-uvas-da-ira\/","title":{"rendered":"As uvas da ira"},"content":{"rendered":"

The Grapes Of Wrath<\/em> (John Ford, 1940)<\/strong><\/span><\/p>\n

Non lembro a primeira vez que vin As uvas da ira<\/em><\/a>. Sei que non foi no cine, sen\u00f3n na pantalla da televisi\u00f3n, nos anos en que hab\u00eda s\u00f3 as d\u00faas canles de TVE. Impresionoume, \u00e9 imposible ficar indiferente diante desta pel\u00edcula. Daquela a\u00ednda non lera a novela<\/a> en que se basea, un texto extraordinario. Escrita por John Steinbeck <\/a>en 1939, John Ford realizou o filme en 1940. Os dous conseguiron que a familia Joad, a cerna do relato, quedase para sempre como paradigma dos males que trouxo a Gran Depresi\u00f3n dos anos trinta.<\/p>\n

Al\u00f3 van m\u00e1is de setenta anos! E, non obstante, a pel\u00edcula parece feita onte mesmo, non hai m\u00e1is que reparar no que nela se conta<\/a>: desafiuzamentos de familias \u00e1s que os bancos deixan sen casa e sen terras; as longas ringleiras de parados, a pobreza e a fame; a emigraci\u00f3n como alternativa; a cobiza dos empresarios, a pagar salarios de miseria ampar\u00e1ndose na moita xente que precisa traballar; a solidariedade entre os que nada que te\u00f1en, a loita dos explotados por conseguir unha sociedade m\u00e1is xusta\u2026 As imaxes<\/a> da fot\u00f3grafa Dorothea Lange<\/a> amosan ben a amargura daqueles anos.<\/p>\n

Volv\u00edn ver a pel\u00edcula hai tempo, cando sa\u00edu en v\u00eddeo. Logo, o DVD permitiume vela restaurada e en versi\u00f3n orixinal. E hai pouco tempo, durante os meses en que escrib\u00edn Fantasmas de luz<\/em><\/a>, volvina ver varias veces, formou parte da mi\u00f1a documentaci\u00f3n b\u00e1sica para ese libro.<\/p>\n

A novela \u00e9 magn\u00edfica, mais a pel\u00edcula \u00e9 inesquecible: as s\u00faas imaxes qu\u00e9dannos gravadas no cerebro e no coraz\u00f3n. Un filme de denuncia, unha historia que se ve con emoci\u00f3n; John Ford era un xenio <\/a>contando historias que chegasen a todo o mundo. Por riba, aqu\u00ed contou cuns actores extraordinarios, de Henry Fonda a John Carradine, pasando por Jane Darwell, a que ser\u00e1 para sempre Ma Joad, a nai que terma da familia toda. A que, no plano final con que remata o filme, pronuncia estas palabras de rebeld\u00eda e esperanza:<\/p>\n

\u00a0Nunca poder\u00e1n acabar con n\u00f3s, nin esmagarnos.<\/em><\/p>\n

Sempre sairemos adiante, porque nosoutros somos o pobo.<\/em><\/p>\n