{"id":7325,"date":"2012-10-31T16:36:17","date_gmt":"2012-10-31T14:36:17","guid":{"rendered":"https:\/\/agustinfernandezpaz.gal\/grupo-salvaxe-the-wild-bunch-1969-2\/"},"modified":"2013-04-03T14:09:23","modified_gmt":"2013-04-03T12:09:23","slug":"grupo-salvaxe-the-wild-bunch-1969","status":"publish","type":"post","link":"https:\/\/agustinfernandezpaz.gal\/en\/grupo-salvaxe-the-wild-bunch-1969\/","title":{"rendered":"Grupo Salvaxe"},"content":{"rendered":"

The Wild Bunch<\/strong> (Sam Packinpah, 1969)<\/span><\/p>\n

\"\"Vin por primeira vez esta pel\u00edcula<\/a> un s\u00e1bado do mes de marzo de 1970, no cine Novedades de Barcelona, unha sala de estrea que xa non existe. Volvina ver dous ou tres d\u00edas m\u00e1is tarde, e recunquei na seguinte fin de semana, na compa\u00f1a dunha boa amiga coru\u00f1esa. Moi poucas veces experimentara tal entusiasmo por un filme, era raro sa\u00edr dunha sala tan fascinado e conmovido, coa conciencia de que acababa de asistir a unha proxecci\u00f3n que nunca poder\u00eda esquecer.<\/p>\n

O desexo de vela unha vez e mais outra obedec\u00eda tam\u00e9n ao feito de que, nuns tempos onde non hab\u00eda v\u00eddeo nin nada semellante, quer\u00eda deixala ben fixada na memoria. Por fortuna, pouco tempo despois, a revista Film Ideal<\/em> editou un n\u00famero dobre onde vi\u00f1a o gui\u00f3n completo da pel\u00edcula de Sam Peckimpah<\/a>. Al\u00ed estaba a posibilidade de reler os di\u00e1logos e revivir as escenas a trav\u00e9s deles. Por certo, onde meter\u00eda eu esta revista que non a dou atopado?<\/p>\n

Naquelas datas eu non vira a\u00ednda as anteriores pel\u00edculas de Peckimpah<\/a> (Duelo en la Alta Sierra<\/em> e Mayor Dundee<\/em>), mais non perd\u00edn ningunha de todas as que vi\u00f1eron despois: La balada de Cable Hogue<\/em>, Perros de paja<\/em>, La huida<\/em> ou Pat Garrett & Billy the Kid<\/em>, co \u00abKnockin’ on Heaven’s Door\u00bb de Bob Dylan como pano de fondo.<\/p>\n